政情：議辦做票站盧俊宇或失員工薪酬
上個月有團體舉辦罷工罷課公投，有部分區議員用辦事處做投票站，當中屯門區議員盧俊宇尋日話六月份員工薪酬申領仍然未被處理。佢話收到屯門區議會秘書處通知，話檢視緊佢六月份嘅員工薪酬申領，原因係有人投訴佢用辦事處做罷工罷課公投投票站。
民政署早聲明不發還公投開支
實際上，民政事務總署喺公投之前已去信區議員，指明若區議員將其辦事處用作公投票站，相關開支將不獲發還，亦有發表相關嘅聲明。
但盧俊宇對呢件事覺得好嬲，佢話已經冇申領公投當日嘅員工薪酬，一早同咗員工講係義務幫手。但有關方面冇畀機會佢解釋同溝通，亦都答唔到幾時會有最終決定，佢會要求有關當局畀確實回覆解釋事件，同時會考慮向申訴專員公署投訴。
佢話如果最後真係唔批有關支出，計過條數人工連租金，自己要承擔大約三萬八千蚊。佢批評呢啲係一連串嘅白色恐怖。
雖則佢覺得呢件事好無稽，但實情政府早已作出警告，唔係應該預咗嘅咩！