跨境毒品掃極都有 上海仔保護傘夠照

神台貓屎,神憎鬼厭!毒品害人一生,何止神憎鬼厭,仲人人喊「打」添!無錯,打擊毒品,各地政府無不雷厲風行,而內地向來積極聯手打擊本港黑幫和勝和前坐館泰國大毒梟「上海仔」郭永鴻嘅販毒集團,經常破獲市值億億聲嘅毒品。

嗱!廣西南寧市公安局近日先後聯合其他省份公安機關,破獲兩宗公安部部級毒品目標案件和一宗特大系列毒品案,發現當中有犯罪集團利用大型工程車掩飾,從邊境販運毒品;行動中共檢獲二百三十公斤冰毒及海洛英,市值約八點九億港元,六十四名疑犯被捕。多次嘅行動和拘捕,據悉已斬斷一條涉及到邊境─雲南─廣西─廣東─湖南嘅販毒通道,成績斐然!

唔講唔知,今趟係過去六百多日第九十六宗涉及中國大陸、台灣、泰國、緬甸、澳洲、新西蘭、日本、菲律賓、越南、馬來西亞及歐洲嘅毒品案,佢哋都有共同特點,就係全部涉及上海仔販毒集團。粵港澳嘅掃黑除惡行動陸續有來!據知中央已一早統一部署針對跨境犯罪嘅大規模掃黑行動,並派身兼國務委員嘅公安部部長趙克志親自南下深圳,高調督導打黑,有震懾粵港澳黑幫犯罪集團作用,並為大灣區「洗太平地」。此外,趙克志早前亦到訪緬甸、柬埔寨和老撾,以加強打擊由黑幫操控嘅霹靂可卡因跨國犯罪活動。

講真,以內地咁嘅聲勢,有乜理由至今只係拉到一啲上海仔嘅蝦兵蟹將吖!罪惡滔天嘅上海仔喺香港一味靠混靠滾,貪威識食,吹到自己如何如何有把炮,連本港退休高級警司王福林都係佢「條o靚」,兩條友拍住過大海搵食,又衰貪心,竟偷取本港富豪存放於夾萬嘅籌碼及現金合共六千萬元。其後被富豪發現並到澳門舉報二人劣行,遭通緝至今。照道理,鳥為食亡,人為財死!一個貪婪無度、背信棄義、犯案纍纍嘅黑幫大毒梟上海仔,眾叛親離,着草落難江湖,老早應該如江湖中人斷言,條趴街嘅下場係「獵狗終須山上喪」,死得好樣衰至啱(口)(架)!

內地近幾年來如此高調掃毒打黑,而粵港澳毒品偏偏掃極都有,而且所涉跨境集團嘅毒品案,全涉及上海仔,冇古怪至奇。事實上,境外毒品輸入來來去去都係嗰幾條路線啫,有幾難堵截!若然布下天網,上海仔即使有三頭六臂,睇怕插翼難飛喇!每次喺警方執法前,上海仔都可聞風先遁,你估佢有千里眼咩?之唔係獲警方及律政司兩把保護傘包庇!惡貫滿盈嘅上海仔至今逍遙法外,仲自恃有「全國法律保護傘」照住!中央真有決心掃毒打黑,擒賊先擒王,正本清源,只有大毒梟上海仔伏法,毒根一除,十里春風吹極都唔生喇!