政情：香港武漢兩邊走 馮浩賢焗坐28日疫監
新冠肺炎疫情最先喺湖北省爆發，重災區武漢更一度封城七十六日，期間香港駐武漢辦主任馮浩賢（Vincent）一直喺當地留守，直至四月下旬先返香港。Vincent尋日就喺Facebook（Fb）上貼文，交代自己已經返咗去武漢工作，仲形容自己之前好似過咗一個「長假期」添！
網友笑指日日有人工
Vincent喺Fb上大呻自己前後浪費咗廿八日「坐疫監」，包括早前由武漢返港後需要接受十四日隔離檢疫先可以返屋企，以及日前喺內地口岸隔離十四日先可以返回武漢繼續工作。有網友就講笑咁留言同Vincent講，話佢坐嘅疫監是有意義嘅，因為每一日都有人工收；亦都有網友希望佢下次返香港時，可以唔使再坐疫監。
武漢有乜嘢改變呢？Vincent話雖然依家武漢已經重開，但若果想將經濟恢復到昔日水平，恐怕仲要行一段漫長嘅路。佢又話依家公寓嘅清潔阿姨都返晒工，食完晚飯後可以懶洗碗咁，一邊睇住英超，一邊聽香港管弦樂團嘅直播演出添！