政情：宣傳變招 梁美芬推歌籲勿攬炒
過往議員要宣傳自己，多數係整吓橫額同印制宣傳單張，但最近似乎變咗招，用唱歌作為個人宣傳方法，當中包括梁美芬（Priscilla）同何君堯（Junius），事關佢哋兩個近日都先後透過網絡推出原創歌曲，引起網民熱議，瀏覽量非常高，留言及分享數量同樣驚人。
大吸點擊留言
其中Priscilla上月中率先喺Facebook上發布歌曲《點解要攬炒》，佢引領眾人身穿白衣合唱，唱出反對暴力攬炒及破壞。無幾耐，Junius都發布同「戰狼縱隊」成員合唱及說唱嘅《國護君安》。Priscilla首歌瀏覽量更為其專頁近三個月嚟所有貼文中最高，影片留言及分享數量都係近三個月內最多，至今就分別有近六千條留言同三千多次分享。
其實歌曲唔單止有高瀏覽量，仲連帶互動率都急升，似乎都真係一個唔錯嘅宣傳新招，而最近一周擁有最高互動率嘅十條影片，當中建制派議員就佔咗九條，睇嚟通過網絡視訊作個人宣傳，都不失為一個好方法。