政情：公民講場：綠置居如爛屋 業主投訴中伏

置業安居係每一個港人嘅夢想，然而購買房委會嘅物業，可能換來一場噩夢！有一批綠置居計劃旗下嘅麗翠苑業主，投訴房屋委員會建屋質素及用料參差，入伙不足一年就發現屋苑大部分設施均已破損，有人入住單位後經歷兩次屎水倒灌，至於屋苑管理亦問題多多，渠蓋常爛、走廊堆滿垃圾亦冇人清理、衞生環境差劣，猶如「買咗一間爛屋」。為幫助基層人士置業，綠置居嘅售價雖然較市價要低一半，但建屋同管理都質素都唔應該大打折扣！運輸及房屋局局長陳帆身兼房委會主席，若對小業主嘅訴求闊佬懶理的話，因住做壞房委會個招牌呀！