政情:黃何詠詩離任中西區民政專員

中西區區議會出現人事變動,政府尋日公布該區嘅民政事務專員黃何詠詩將會調任,而大學教育資助委員會秘書處副秘書長梁子琪,就由今日起接替黃何詠詩嘅職務。不過黃何詠詩嘅去向,政府喺新聞稿入面未有交代。

曾遭集體投訴 梁子琪將接任

由二○一六年起出任中西區民政事務專員嘅黃何詠詩,近半年來多次指區議會嘅部分議程唔符合職權範圍,拒絕向議員提供會議場地同秘書服務,同當區嘅民主派區議員關係鬧到好僵,會議上對話都好有火藥味,更曾遭一眾區議員禁錮於辦公室逾四小時,而區議員仲集體向申訴專員公署投訴過佢添!

至於梁子琪則於一九九八年加入政務職系,曾經喺多個政策局同部門工作,包括民政事務總署、前環境食物局、前衞生福利及食物局、大學教育資助委員會秘書處、政府資訊科技總監辦公室同教育局等。

第一手消息請下載on.cc東網iPhone/iPad/Android/Windows Phone Apps