政情：建制衰遲到 泛民玩杯葛 鬥卸膊

其實討論教材本身係研究幼稚園、中小學教科書及教材編製小組委員會嘅職責，但負責主持小組會議嘅民主派議員梁耀忠不斷處理選舉程序問題，搞到委員會至今仍未選出主席。有議員就建議繞過小組委員會，而葉劉早前亦決定召開教育事務委員會特別會議討論教材問題，但民主派議員對決定相當不滿。唔知係咪因為咁，民主派尋日除委員會副主席葉建源外，其餘十三名委員均不在席，而會議亦因法定人數不足而流會。

泛民被轟「唔Happy就唔開會」

咁點解一直關心教材內容嘅部分建制派議員冇出席呢？原來有幾位建制派議員「衰遲到」。議員蔣麗芸話遲咗少少到會議室，並唔係有心唔去，仲鬧爆民主派「唔Happy（開心）就唔開會」，成日要建制派頂住開會法定人數，但難免建制派議員都有交通問題或私人事務要處理喎。

議員葛珮帆就話開會係每個議員嘅責任，雖然尋日因部分地方改道而造成塞車，但講到尾自己都係遲到，佢承認錯誤並稱要負上部分責任，同時「暗寸」咁多位民主派議員去咗邊，呻話「就算佢哋（民主派議員）喺立法會，都未必入去會議室」。

至於議員麥美娟同周浩鼎就表示早前已向委員會請假，其中麥話尋日去咗學校開會，都係做教育相關事務，又怒斥民主派將責任歸咎於建制派，反問「政府冇份出糧畀泛民咩？」

特別會議開唔成 葉劉嘥心機

葉建源就喺社交平台發文，話民主派議員早已要求葉劉撤回召開特別會議嘅決定，批評葉劉強行召開會議。佢又話小組嘅目的就係搵出個別教材嘅紕漏，對教育界施加壓力，以合理化加強監督教科書同教材嘅要求。葉建源又話，呢種施壓同攻擊對香港嘅教育發展同社會和諧都係有損無益，希望建制派議員停止這種做法。

其實民主派為咗阻止討論教材編製，已擺到明唔開會，反而建制派想討論，就應該搵齊人開會，依家開唔成會，仲點討論呢？睇嚟葉劉都係白費心機。