政情：慢過澳門廣東 健康碼得個講字 盧偉國嘆港府搞乜
隨着疫情趨向緩和，好多人都希望同鄰近地區恢復往來，而香港嘅健康碼機制，就一直都只聞樓梯響。工程界議員盧偉國日前喺社交網站貼文，指社會上好關注政府何時推出健康碼機制，畀通過病毒檢測、有實際需要嘅市民往來澳門同廣東省處理要務。然而廣東省同澳門早已推出健康碼制度，至於香港方面就拖拖拉拉，慨嘆香港政府究竟搞乜？
盧偉國引述澳門方面嘅消息，話廣東省同澳門健康碼互通已經有個多月，為數以萬計嘅粵澳兩地居民提供出入境嘅方便。反觀香港嘅健康碼不但檢測費用高昂，推出時間更加一拖再拖，同人家相比可謂遠遠落後，既不利民生所需，更令有需要跨境工作嘅工程界人員大受影響。盧要求政府盡快推出「健康碼」機制，否則影響將會好大！