政情：修例風波眾籌惹議 黃國健胡志偉爆罵戰
舊年六月初爆發嘅修例風波至今仍未平息，身兼行政會議成員嘅議員黃國健（KK）同身兼民主黨（白鴿黨）主席嘅議員胡志偉，尋日喺一個電台節目中因眾籌問題起爭拗，仲嗌到疊晒聲，要主持人調停添！
話說KK首先提到修例風波「好多嘢都好唔正常」，包括物資、人力、宣傳等，據聞「有糧出」，好明顯係有組織、有訓練，認為唔係一般人可以做到，胡志偉就即刻話KK唔相信港人，又問知唔知市民拎錢去支援、落去街站捐款，每個箱都塞滿錢，實情係一個一個港人入錢落去，反問咁樣點計數先，胡志偉同時覺得KK嘅講法係對港人一種侮辱。
黃：美國喺全世界搞事
KK其後反駁，話佢唔係唔信香港人，而係唔信美國，仲舉例子話全球唔少國家發生嘅顏色革命，完全暴露咗美國喺世界各地搞事，反問美國今次喺修例風波入面扮演緊咩角色？KK又話依家好多人都識眾籌，點解滙豐郁一郁星火基金戶口會畀人破壞兩隻獅子銅像，大家都心知肚明啦，叫胡志偉唔好咁護住美國先。
胡志偉即刻否認係幫住美國，提議不如KK都試吓搞眾籌，寸爆話KK啲資金來源係嚟自「紅色經濟圈」吖嘛，話佢哋講緊嘅係一個現代城市，畀人透過「聚沙成塔」嘅方式扭曲成勾結外國勢力，強調咁樣係講唔通。