政情:民主阿婆想走冇咁易 官媒:漢奸都冇好下場

今年已年屆八十歲、被內地官媒炮轟為「叛國禍港四人幫」之一嘅「民主阿婆」、前政務司司長陳方安生日前宣布退出政壇。不過,官媒尋日以「禍港頭目一句『退出政壇』就能逃避懲罰嗎?」為題發文,質疑民主阿婆選擇退出政壇嘅時機,同中央政府即將完成審議「港版國安法」有關,提醒佢即使宣布退落嚟,未來都可能要面對「懲罰」。

官媒喺文章度話,「港版國安法」立法工作正在穩步推進,仲形容喺之前一直氣燄囂張嘅亂港分子,如今都難掩慌亂,仲引述網友啲精警評論,話「國安法一出,牛鬼蛇神即現形」,更加嘲笑呢班一直同中央政府對抗嘅人士,形容依家嘅情況就係「港毒本是同林鳥,大難臨頭各自飛」。

文章又引述民主阿婆日前宣布退出政壇時,話自己「想要過一段較為平靜的生活」。官媒批評民主阿婆同其他反中亂港人士過去將香港搞到咁唔平靜,但如今竟然講呢番說話,形容成件事非常諷刺;又質疑民主阿婆過去一直搞亂香港,但就想靠講一句退落嚟就可以當乜事都冇,反問呢個世界係咪真係有啲咁着數嘅嘢呢?

李漢奸被嚇到做牆頭草

官媒又話「港版國安法」在港通過在即,強調亂港分子冇可能靠一走了之躲避懲罰,仲引述喺社交平台上有網民話,「想走!沒那麼容易!漢奸沒有一個好下場!」

查實自從中央政府宣布制訂「港版國安法」開始,過去有唔少反中亂港人士都開始有啲「縮沙」嘅迹象。就好似同屬「叛國禍港四人幫」嘅民主黨(白鴿黨)創黨主席李柱銘(李漢奸)咁,佢早前因組織及參與未經批准的集結及非法遊行等罪名被捕時,就話過可以同一眾年輕人一齊行民主路,覺得舒服晒;但佢日前接受外媒訪問時就自認係「中國公敵」,又話年輕人唔鍾意佢,仲話「提倡攬炒的人,他們一無所知。」有學者批評佢前言不對後語,被「港版國安法」嚇怕,大鬧佢只不過係「牆頭草」!

漢奸黎估自己坐半年監

另外,被內地官媒炮轟為「叛國禍港四人幫」之首、有「漢奸黎」之稱嘅壹傳媒黎智英,佢涉嫌喺舊年八月至十月期間,多次參與和組織未經批准的反修例遊行,早前被捕及控以多項罪名。佢日前接受日本雜誌訪問嘅時候,亦都話覺得自己嘅情況唔樂觀,仲話估計自己或者會被判囚六個月添!

第一手消息請下載on.cc東網iPhone/iPad/Android/Windows Phone Apps