中環出更：七大項目五個冇影解釋欠奉 陸頌雄擬線上論壇砌港鐵
港鐵工程醜聞不斷，又超支又延誤。議員陸頌雄會趁著本周末獲邀做線上論壇嘉賓嘅機會，連同公眾一齊狂質參與論壇嘅政府官員同港鐵代表。
線上論壇由香港鐵路運輸專業人員協會舉辦，主題係「香港鐵路工程，這麼近那麼遠」，起得好應景，事關鐵路工程一拖再拖。屆時運輸及房屋局局長陳帆同港鐵行政總裁金澤培同台，陸頌雄打算到時問有關《鐵路發展策略二○一四》嘅進度，事關當時計劃起七個鐵路項目，但過咗六年只係得東涌西延線同屯門南延線已經交上立法會。陸頌雄狠批其餘五個項目「冇影」，話做唔到嘢都應該同公眾解釋。
超支不斷 應向公眾交代
陸頌雄話原本打算喺立法會鐵路事宜小組委員會嘅最後一次會議質問政府，但佢話對方講法好隱晦，話「總之有啲嘢卡住」，於是佢決定喺論壇問清楚仲好，加埋市民一齊表達意見。
鐵路工程不斷超支延誤，佢話立法會見到工程超支就唔想批，結果再影響進度；跟住工程延誤要承擔加價成本，超支情況又更加嚴重，成件事就「無限loop」，佢打算喺論壇分享埋有關嘅事。
卓妮