中環出更：講起肺癆有餘悸 藍義方：身心健康抗百病
健康無價，每個人都希望遠離惡疾同病痛。尋日香港防癆心臟及胸病協會（防癆會）舉行設計比賽頒獎禮，該會嘅主席藍義方指今年肆虐全球嘅新冠肺炎，好多人都視為世紀瘟疫，但其實幾十年前亦有一種損害肺部嘅傳染病喺香港蔓延，今日老一輩港人提起亦猶有餘悸，而呢種令人談虎色變嘅疾病，就係俗稱肺癆嘅結核病。
藍義方話昔日肺癆係死亡率最高嘅疾病，但幸好隨住時代嘅進步，依家肺癆病已非不治之症，況且由五十多年前開始，香港嘅孩童都有接種預防肺癆嘅疫苗。由於肺癆同新冠肺炎一樣，可透過飛沫傳播，要防止染病除咗戴口罩，注意衞生同保持社交距離，平時多着重身心健康，增強個人嘅抵抗力，向來都係避免疾病纏身嘅最佳良方。
劉少懷籲假日行山遠足
防癆會董事劉澤星（Wallace）就覺得維持心境開朗好重要，配合埋適量運動就更加有效。佢話後生嗰陣精力旺盛，會從事各種球類活動，依家年紀大咗就以跑步居多。Wallace話同朋友一齊跑就最好，互相砥礪自然會跑得耐啲，不過有時獨自跑步，都可以享受一下個人空間。
防癆會健康推廣委員會主席劉少懷，同樣覺得做運動好重要，佢話前排先同同事行山，都行咗六公里，建議大家不妨趁假日多啲去行山遠足咁話。佢又話長者同慢性疾病患者需要注重飲食，多食蔬菜吸收均衡營養，可加強免疫力。
女士們除咗想身體健康，都希望保持外貌年輕。防癆會副主席林貝聿嘉今年九十二歲，但從外表完全睇唔出，佢話自己會做伸展運動，同埋向來都秉持不煙不酒呢個家族傳統。林太曾出任灣仔區議會主席大約二十年，講起今屆區議會同政府關係緊張，佢覺得惋惜，又話以前會互相配合。佢覺得區議會應該以民生為本，唔好畀政治凌駕。
卓妮