政情：公民講場：憂新發展區交通不便 陳帆要度橋搞番掂

交通配套向來都係新發展區嘅重要項目。尋日立法會財務委員會討論洪水橋新發展區嘅工程項目，該區嘅交通配套就成為議員關注嘅焦點，有意見認為公營房屋嘅位置離港鐵站太遠，亦有議員指現時元朗同天水圍居民每朝早返工都大排長龍，就算花好長時間都上唔到車，若果將來多咗廿萬人搬入新發展區，恐怕情況會更加惡化。睇嚟運輸及房屋局局長陳帆真係要諗清楚點樣協調同構思交通配套，提高鐵路效率同大幅加密巴士班次，否則屆時當區居民真係唔知點算喇。