政情：大學撥款再闖財會 建制泛民又爆罵戰

反修例連串示威衝突蔓延至香港中文大學同埋香港理工大學，當時有指建制派對大學嘅管理好不滿，而且對大學校長有唔少怨氣，所以政府喺上年十一月陸續咁撤回中大、理大同埋香港大學嘅工程撥款，仲聲稱係「需要更多時間解說」。

早喺上年十一月已經有民主派質疑政府係咪向大學宣戰，仲批評政府以政治凌駕民生。事隔大半年後，民主派議員再喺會上批評政府，議員鄺俊宇形容撥款一波三折，斥當時建制派議員語出驚人，包括質疑擴建會令庫房乾涸，所以政府就以「議員關注」為由突然撤回方案，之後仲唔知去咗邊添。曾經喺理大教過廿年書嘅議員黃碧雲仲話，依家理大畀水馬包起幾層，反問係咪叫做「水馬陣大學」。食物及衞生局副局長徐德義就解釋，當時需要重新檢視校方嘅保安設計同埋處理問題喎。而理大校方代表話呢個只係短期措施，會陸續開放出入口。

泛民被斥一唔鍾意就反對

建規界議員謝偉銓（Tony）喺發言時，就解釋話相信絕大部分人支持改善教育嘅撥款，話當時係質疑大學設施會唔會變咗兵工廠，強調自己都唔想見到政府抽起。佢仲暗寸民主派議員，話佢哋一遇到唔鍾意嘅議題就會提出反對，認為可以透過投票同埋質詢解決問題，要求佢哋要用同一標準。隨後佢就疑似學班民主派議員，稱「主席（財委會主席陳健波）我返番嚟喇，唔係你又話我講其他嘢」，陳健波聞言就話，Tony一分幾鐘就返正題已經算好，話「有啲人」講足五分鐘都唔識得返正題。

尹兆堅挑完機急「戴頭盔」

之後議員尹兆堅喺發言時，批評當時建制派抽起撥款係一種懲罰學生嘅表現，仲話平時都好尊重Tony，但今次就大跌眼鏡，認為Tony當初應該踴躍發言，學民主派係咁質問政府點解收起項目，仲鬧Tony嘅說法係不同類對比。佢最後「戴頭盔」話自己發言只係想反駁Tony，知道陳健波可能唔滿意冇問問題，所以就再發言提問。雖然有零星爭拗，但最終議案都喺冇記名情況下通過。