中環出更：失眠冇有怕 梁天富：乘機鍛煉棋藝
都市人生活節奏急促、壓力又大，加上近來又有疫情困擾，以及缺少外出旅遊調劑生活，好多人都遇上失眠嘅問題。唔知一班社會賢達平時又係點樣放鬆自己，輕鬆進入夢鄉？卓妮尋日出席善德基金會舉辦嘅論壇，同該會副主席梁天富（Eddie）傾開先發現，原來佢久唔久都會成晚眼光光，攤喺張床輾轉反側，而佢嘅解決辦法就係捉棋喇！
聽Eddie講，昔日佢較年輕嘅時候，一旦瞓唔着，就會落街同公園阿伯捉棋，由於老友記嘅棋藝往往都出神入化，於是Eddie就喺多次對弈當中，棋藝得以愈見精進。雖然依家個人年紀大咗，落街捉棋嘅意欲不復往年，但幸好拜互聯網所賜，瞓唔着都可以喺網絡同各路高手線上捉棋、過番兩招。
王亞明：飲白酒包保瞓天光
至於該會總理關劉麗霞，就話自己經常保持心境開朗，所以好少受到失眠困擾。除此之外關太仲有一個防失眠嘅心得，就係完成手頭工作之後，先至去見自己想見嘅人、做自己想做嘅事，無公事牽掛自然減壓不少，加上依家間中會弄孫為樂、心境平靜之時又會打坐靜修，咁睇嚟真係乜嘢壓力都畀佢掃走晒啦，唔怪之得晚晚都可以一覺瞓到大天光。
同場又見到主席董吳玲玲，同另一位副主席王亞明（Jeffrey）。講睡眠質素，Jeffrey就冇關太咁好喇。雖然佢都盡量將生活同工作分開，但係有時亦會徹夜難眠，於是佢就會煲吓劇、做吓啲簡單運動，期望藉此令到自己產生睡意。如果呢啲招數都唔奏效，咁Jeffrey就會使出必殺技，就係飲一小杯酒精濃度高嘅白酒，咁就包保好瞓到天光，仲唔會影響第二朝起身咁話。
卓妮