政情：大埔停辦龍舟賽 80年來首次 黃容根：港府應出手
往年端午節多區都會舉辦龍舟比賽，但今年唔少賽事都因應疫情而相繼取消，當中包括八十年來都從未斷纜嘅大埔區龍舟競賽。曾任大埔區議員嘅前漁農界議員黃容根，就喺網台節目上表示，今年停辦賽事嘅另一個原因係由於今屆嘅區議會拒絕批出撥款，佢擔心喺未來三年都得唔到區議會撥款，希望民政事務局可以批出單項撥款，令到呢項傳統活動可以繼續傳承落去。
區會否決撥款
今屆區議會變天，民主派掌握其中十七區嘅主導權，而其中建制派更失落了大埔區嘅全數民選議席。大埔區龍舟競賽過去一直係由大埔體育會同大埔區龍舟競賽委員會合辦，兩個團體喺今年二月向區議會申請一百六十萬元撥款，但係唔少區議員都覺得所涉款項太大，最終否決咗撥款申請。
黃容根就覺得，龍舟競賽係過往一直搞開嘅傳統活動，唔單止扒龍舟健兒參與，連大埔居民同區外人士都可以同樂，又話依家連日本、韓國都有得扒龍舟，覺得民政事務局局長徐英偉應該要諗吓方法，令大埔區呢項傳統活動可以繼續傳承落去咁話。