政情：峯鴿搶手機下月交報告 議員憂泛民拉布傾唔成
話說民主黨（白鴿黨）議員許智峯（峯鴿）喺二○一八年四月，於立法會大樓內強搶一位保安局女行政主任（EO）嘅手機。立法會成立調查有關事件嘅委員會尋日召開最後一次會議，主席麥美娟喺會後話調查委員會已經完成工作，報告亦大致完成，預計下個月向立法會大會提交報告。
不過，近來民主派都成日喺立法會上拉布，麥美娟都擔心即使向立法會提交報告，到時都唔知傾唔傾得成，仲質疑依家拉布係咪為咗傾唔成份報告。
曾被判240小時社服罰款
立法會喺二○一八年四月審議《廣深港高鐵（一地兩檢）條例草案》，峯鴿喺委員會開會期間，喺會議室外搶走一名女EO嘅手機，仲帶埋該手機進入男廁，逗留長達十多分鐘，事件最後報警處理，其後被裁定普通襲擊、阻礙公職人員執行公務同不誠實取用電腦三罪罪成，被判二百四十小時社會服務令同罰款三千八百元。身兼行政會議成員嘅議員葉劉淑儀提出譴責峯鴿動議，立法會於是成立調查委員會調查事件。