政情:終於開會傾空置稅 陳帆冇影 議員鬧爆

政府在去年推出「空置稅」,結果惹來地產發展商強烈批評,而相關嘅《二○一九年差餉(修訂)條例草案》委員會喺尋日終於開到第一個會議,但負責條例嘅運輸及房屋局局長陳帆竟然冇影,搞到畀議員鬧爆。

轟政府資料過時

有關條例草案係針對一手住宅物業,如果發展商持有嘅一手住宅未能喺獲發入伙紙一年內賣出、或以市值租金或以上租出超過六個月,就需要畀相關稅項,仲要按年徵收添。面對依家樓價高企,尋日條例草案委員會開會時,唔少議員都質疑條例能否有效壓抑樓價,其中議員陳克勤仲鬧爆話政府提供嘅資料已經過時,仲批評陳帆缺席會議添。

話說今屆立法會任期餘下約一個月,如果條例草案未完成審議就需要在下屆立法會重新提交。呢個委員會需要喺今個月完成討論,仲要喺下月三日前提交上內務委員會,所以地產及建造界議員石禮謙就講到明,條例草案具爭議性,自己或會提出廿幾項修正案,估計下月三日前都未必完成審議喇。唔知係咪咁,陳帆連出席會議都慳番呢?

第一手消息請下載on.cc東網iPhone/iPad/Android/Windows Phone Apps