政情：鬧張國鈞「契弟」 郭家麒被逐
立法會政制事務委員會昨日開會討論推廣《基本法》，委員會主席張國鈞同民主派議員郭家麒就爆發罵戰，郭家麒大鬧張國鈞係「契弟」，郭最後仲被趕出會議室添！話說郭家麒在會上問相關官員，究竟內地有無選舉權同被選舉權，但張國鈞就指郭所提及嘅憲法問題同議程與推廣《基本法》無關。郭就指張阻住晒唔畀官員去回答問題，問張「係咪真係做契弟做成咁？」
斥言論冒犯侮辱
一句「契弟」隨即觸發罵戰，張即刻問郭「契弟」係指邊個，又指郭「你唔夠膽認咪算囉！」兩人罵戰糾纏咗一輪，最後郭話如果張想認係「契弟」，咪就係講緊佢囉！張嬲嬲哋叫郭收回言論，話郭嘅言論好冒犯同侮辱，但郭點都唔肯收回言論。搞到最後張以郭行為不檢為由，趕郭出會議室。不過，就算郭離開後，其他民主派議員發言指郭提到嘅憲法問題並無離題，張就好肯定咁話已經作出裁決喇！
