政情：行會成員議員願捐萬元 高官照袋知唔知醜

葉劉捐埋囡囡嗰份

話說「現金發放計劃」將會喺嚟緊嘅星期日開始登記，每名年滿十八歲嘅香港永久性居民都有份。日前政府回覆本報查詢時就話，成個政府問責班子都會領取一萬元，打算透過喺本地消費嚟推動同埋刺激經濟，至於被問到會唔會捐出時，政府方面就冇正面回應喇。不過依家做咗民政事務局局長嘅徐英偉，喺仲做緊勞工及福利局副局長時，就呼籲市民捐出畀非政府機構喎。

過往喺政府派錢時，都有唔少政商界名人表明捐錢，至於同政府同坐一條船嘅行會成員又點用呢。葉劉尋日回覆本報查詢時，就話喺二月份有兩名病人因為醫護罷工影響，搞到未能及時接受視網膜脫落手術，之後呢兩名病人亦入稟追討賠償，而佢就早喺三月份，已經預先將呢一萬蚊捐畀呢兩名病人，連囡囡嗰份都捐埋添。

「冇諗過袋落自己袋」

另外都有議員打算將一萬蚊捐出，仲有議員直頭話「都冇諗過筆錢可以自己袋落袋」。Alice就話會將一萬蚊捐畀一個婦女協會，事關因為疫情，個協會搞唔到籌款活動，亦有贊助人話今年會暫停捐款添，所以佢先打算將一萬蚊捐出，用嚟支援基層婦女生活同健康。

同樣都會捐呢一萬蚊嘅仲有議員陳克勤，佢就打算捐畀社福或者慈善團體，同埋佢話早排已經捐咗半份糧出去做紓困基金，唔排除嚟緊呢一萬蚊都會捐埋添。話時話，咁多議員都話捐錢，唔知政府幾時先學識有政治智慧，唔做「守財奴」呢？