中環出更：會期就完 人力委會重選主席
早前政府換班，其中前勞工界議員何啟明就出任勞工及福利局副局長一職。正正因為佢辭任議員，搞到立法會人力事務委員會都要再重選主席，尋日仲要特登召開特別會議，最終民建聯鄭泳舜（Vincent）獲九票當選主席。
喺早前政府公布咗何啟明出任副局長後，事務委員會副主席朱凱廸曾經質疑過自己係咪會做主席。雖然得番一次會議，不過何啟明嘅黨友、工聯會嘅黃國健（KK）就講明點都選主席，咁難怪尋日會再開特別會議啦！
冀盡快處理延長產假議案
就喺尋日嘅特別會議上，KK就提名咗Vincent，至於民主派方面，街工梁耀忠就提名工黨張超雄，最終張超雄獲七票，Vincent以兩票之差當選主席。早前政府繞過內務委員會，將延長產假嘅法案交付人力事務委員會審議，依家已經完成審議，但仲未喺立法會上恢復二讀。Vincent就話會盡快將延長產假提交立法會大會審議，同埋喺餘下會期把握時間討論失業率及如何保就業嘅議題。
另外勞福局近日都公開咗何啟明嘅利益申報，指佢名下有一個位於油麻地嘅住宅物業作自住用途。同時佢係工聯會屬會同文職及專業人員總會會員，以及香港工人健康中心名譽顧問。
卓妮