中環出更：洪文正想當年：讀科技學科個個皆精英
從事社會服務，係唔同職業、唔同背景嘅人能夠聚首一堂嘅好機會。半島東扶輪社日前舉行就職晚會，出席嘅社員同嘉賓都同意助人為快樂之本，其中創社社長洪文正（Alex），又喺席間分享學生時代嘅往事。
任職資訊科技嘅Alex，話時下有一種觀念，以為埋首於科技相關嘅學科，必定係「毒男」居多。但Alex諗番當年，都有四分一同學係女仔。佢覺得女同學做事細心，又善於同人溝通，呢啲優點都值得男同學借鑑。另外，科技學科喺今日可能會被人視為「水泡科」，但Alex話佢讀書嗰陣每個同學嘅分數都足夠讀醫，係精英之中嘅精英！不過科技日新月異，Alex都要一直進修跟貼時代嘅步伐，佢仲覺得啲嘢易學咗，果然係高材生！
蔡金挺：機會留畀有準備嘅人
有「入信大王」之稱嘅半島東扶輪社應屆社長蔡金挺（Henry），想當年原本係擔任銀行文職工作，但諗到自己只係中五畢業，覺得晉升有難度，後來佢靈機一觸，諗到不如自行創業，於是佢就同僱用自己嘅銀行商討，成功接咗寄信嘅工序嚟做。Henry諗番自己嘅創業經過，總結一句話就係「機會係留畀有準備嘅人」。雖然事業有成，Henry仍打算退休後讀番個大學學位，以完成自己嘅「大學夢」。
何文田山扶輪社社員黃詩韻（Cecilia）從事電訊行業，佢憶述大學嗰陣係讀市場營銷學，畢業之後唔知打咩工好，咁啱見到有份電訊公司嘅工就姑且試試，之後一路做上去邊做邊學，即使依家工作好忙碌，都會抽時間出嚟做善事報答社會。另外半島東扶輪社最近喺疫情下捐咗一批平板電腦畀屯門醫院，隔離病房嘅病人就可以用視像方式同家人見面。
卓妮