政情：指華人遭嚴重歧視 陳健波：移民要諗清楚

冇錢冇技術 全世界都唔歡迎

波哥話移民冇分啱定錯，但就「有辣有唔辣」，有好處就自然有壞處。如果冇錢又冇技術，全世界都唔會歡迎你，只會畀人睇唔起。如果你有錢、後生、又有技術，移民未必係壞事。但要留意外國生活模式同香港好唔同，唔係落樓就可以行街、睇戲、食飯咁方便。

喺疫情底下，波哥話相信外國人呢幾年對於華人嘅歧視，應該都幾嚴重，輕則畀人辱罵，重則可能畀人毆打。有美國人形容，華人喺美國所受嘅對待可能仲慘過黑人，而歐洲國家亦唔好得去邊。波哥提醒如果想帶小朋友移民就要更加小心，怕佢哋喺學校會受欺凌。