政情：林健鋒開會分心 睇美暴亂新聞
平時議員開會要坐定定，如果啲會由朝早開到夜晚，真係少啲精神都唔掂。商界議員林健鋒日前喺開會期間，唔知係咪悶得滯，攞部手機出嚟撳電話，仲睇新聞分心添。
主持會議冇熄電話
話說日前立法會召開監察西九文化區計劃推行情況聯合立小組委員會會議，林健鋒喺開會期間喺度撳電話，細看之下先發現，原來佢喺度睇緊近日美國嘅反警暴新聞，搞到主持緊會議時仲冇熄番個電話。
其實平時都唔少議員喺開會期間撳電話，有啲議員會覆吓Whatsapp，又有啲議員會睇啲資訊性嘅嘢，再過分啲就會打吓機咁。其實林健鋒睇新聞都唔算大問題，之不過佢身為小組委員會嘅主席，喺會上要負責主持會議，雖然個會好彩冇乜甩轆，不過作為主席係咪應該要做番個榜樣，喺主持會議期間專心啲，睇少陣電話呢？