政情:醫管局僅得16位手語傳譯員

除咗醫療服務,原來醫管局亦有責任提供手語傳譯。話說一名患抑鬱症及有自殺傾向嘅聾啞病人早前獲轉介入住葵涌醫院,後來因院方未能安排手語傳譯及容許該病人出院,結果病人出院翌日自殺身亡。有議員就此事要求食物及衞生局「解畫」,食衞局尋日就透過書面回覆議員質詢,指醫院管理局為照顧有特別需要嘅病人,已透過不同渠道,包括服務承辦商及兼職法庭傳譯員,於公立醫院和診所為有需要嘅人士安排手語傳譯服務。

病人可搵親友幫手

食衞局表示截至五月底,醫管局嘅服務承辦商共有十六名傳譯員,服務時間為朝早八點至晚上十點。而由本年三月中開始,醫院及診所亦可以視像方式為病人提供手語傳譯服務。局方指,病人除可以要求醫院安排手語傳譯,亦可自行安排手語傳譯員或懂得手語嘅親友進行傳譯,以協助病人與醫護人員嘅溝通。醫管局會繼續加強向有需要人士宣傳手語傳譯服務,公立醫院亦已印備及張貼海報,以作宣傳,協助病人了解如何使用有關傳譯服務。

第一手消息請下載on.cc東網iPhone/iPad/Android/Windows Phone Apps