政情：許正宇回應質詢照稿讀 被斥答非所問

話說議員張華峰希望了解政府有冇借鑑美國股市因新冠肺炎疫情而一度出現嘅熔斷情況，會唔會喺本港股市引入熔斷機制，以保持港股穩健。另外，有議員關注近日經濟市場盛傳港元唔穩健，鼓吹市民去大量兌換美元，問許會做啲乜嘢去穩定市場信心？

代主席忍唔住叫入正題

許回應時就用好似朗誦嘅腔調頌讀一早準備好嘅答案，話港交所今年五月中起已優化現行嘅市場波動調節機制，覺得暫時都穩定到市場波動咁話，又強調香港金融體系穩健等等。聽到呢啲回應，代主席李慧琼都忍唔住提許答問題時要入番正題。之後金融界議員陳振英問到有關政府要審慎投資本地市場嘅原因時，許只回答「投資外匯基金有多方面原因，其中一個係避免過分集中市場風險」，跟住就坐番低，搞到代主席都呆咗一呆，先意識到原來佢已答完。

喺回答議員謝偉俊嘅提問後，謝亦忍唔住鬧爆許「明白新局長作答會緊張啲，但回答都唔係完全唔相干吖，好似讀書咁讀出嚟 」，但許都係重複之前準備好嘅答案。話時話，雖則佢可能覺得要長話短說，但都要答得清楚先得o架！