政情：回應賣國試題 辣㷫黨友 徐英偉升官即變箭靶

「賣國試題」引起軒然大波，社會爭議不休，而香港考試及評核局最終「跪低」，應教育局要求將該試題取消，但係餘波未了，唔單止有十三名議員日前聯署去信教育局局長，要求考評局公開評卷參考（Marking Scheme），更有議員關注考評局等法定組織嘅成員人選、角色同職能係咪有問題，尋日喺立法會大會提出質詢，問政府會唔會將某啲法定組織職能移交畀成員由市民選出的組織，畀市民有更多機會參與公共事務，例如區議會。

考評局屢上財會申撥 議員鬧爆

「升呢」做局長個幾月嘅徐英偉只係重申，政府挑選人才嘅原則一向用人唯才，唔單止會由當局直接委任，亦會由組織或機構自行委任學者、工商界人士等專才或透過選舉產生，從而安排合適人選出任有關職位，以確保唔同社會界別人士有機會參與公共服務。

聽到呢番說話，好明顯係耍官腔。身兼行政會議成員嘅議員張國鈞話，雖然唔少法定組織都係獨立運作，但唔代表一帆風順，佢舉例話早排DSE歷史科出現「賣國試題」一事釀成大錯，問政府到底有乜嘢政策能夠預先介入，避免造成大錯？同為行會成員嘅議員葉劉淑儀話考評局係自負盈虧，但多次上立法會財務委員會申請撥款，考評局亦唔單止試過向職員發放花紅，仲有試題外洩，葉劉認為應該要嚴厲加強對職員嘅管理。

見到勢色唔對，徐英偉就話教育局事後已派出人員了解文憑試出題機制，亦要求考評局取消試題同作出適當調整，確保考生獲得公平對待，教育局已檢討現行機制和運作，務求維持試題質素。佢又話考評局嘅經費嚟自唔同背景、投資等方式，同時有現行機制監管同一系列法例處理違規事項。

非建制派議員鄭松泰亦問政府會唔會將某啲法定組織職能，移交畀成員由市民選出嘅組織，令公眾有更多機會參與，好似係區議會嘅公共事務，但徐都只係重複之前嘅答案。

徐英偉講嚟講去都係三幅被，既冇話會加強監管呢啲法定組織，亦冇話考慮改組等等，係咪咁就過到骨？大家拭目以待嘞！