抗疫不力穿晒窿 廢官無能累街坊

台灣已連續五十多日無新冠肺炎本土確診病例;一橋之隔嘅澳門都連續五十多日無新增確診;而香港呢個「福地」呢?本地零感染個案原已頂到十六日,一線曙光在望,可惜日前「斷纜」,尋日仲新增六宗新確診,新冠肺炎有死灰復燃迹象!

嗱!功夫茶喺踏入鼠年,大早指出香江鼠年多災異,點止長洲、大嶼山今年一月初感到輕微地震咁簡單啊!果不其然,日前物流貨倉小型爆發,尋日又增添四宗沙田瀝源邨祿泉樓居民群組嘅本地確診個案,另外兩宗係輸入個案。最大鑊係本地確診個案,佢哋係隱形帶病毒者,冇外遊,起初冇病徵,源頭感染未明!即使傳染病專家都係估估吓,可能係撳(車立)感染、甚至因信箱黐得埋感染戶,開信箱取信而賴嘢,專家話可能涉及環境感染喎!總之,人心惶惶不可終日!返屋企都一步一驚心!

香港依家就好似死咗獨生仔嘅老寡婦,即係想有好日子過,冇一點指望咯!阿哥,廢官抗疫得把口,至叻賊過興兵,疫情稍緩就「窩心」派底底「想見你同心口罩」,依家疫症重臨,廢官就做鍵盤戰士指指點點,廢噏呼籲市民戒煙,以減低感染新冠肺炎風險!唉!火都燒埋身咯,先叫你預備滅火筒,咁嘅廢官當道,防疫穿晒窿,香港有乜辦法唔多災異吖!

嗱!原本明日屆滿嘅禁聚令、以及規管食肆經營規例又要再延長多十四日,去到六月十八日;同時,內地、澳門、台灣和其他入境嘅檢疫要求,強制隔離令分別又要延長一個月及三個月。政府就話呢啲叫「謹慎態度」喎!

喂!咁「謹慎」點解咁多甩漏?社區嘅隱性傳播鏈,咁似廢官嘅廢噏切極都唔斷嘅?廢柴政府成日叫人注意個人衞生,勤洗手、出外戴口罩;之但係政府喺公共衞生方面交唔交到功課吖?本報日前就揭發房署辦事不力,多幢公屋成為疫廈後,再遭群鼠圍襲,其中疑因喉管播毒致有居民感染嘅青衣長康邨康美樓、大埔富亨邨亨泰樓,早前,風頭火勢,政府派員徹底清毒,之後又冇再跟進,好似清潔香港運動咁,高官擺個甫士,揸住條毛巾抹兩嘢就全個香港亮麗晒!

各位街坊,係人都知搞衞生要時時勤拂拭,一次消毒,永恒有效?玩魔術咩!結果老鼠橫行,上埋樓,疫廈爆衞生大災難!房署固然防治不力,有關高官又對公共衞生向來側側膊,唔多覺。食環署滅鼠勁低能,高官又佛系抗疫,咪話功夫茶唔提醒,夏天殺到,蚊患又會成為問題!鼠蚊加疫情,睇你點死!禁聚令等到冬來北風吹,屆時廢官又撲出嚟呼籲:切勿多過八人圍住打邊爐!情人更不可鬆懈除罩打茄輪吖!