中環出更：疫情打沉市道 簡陳擷霞：心態正面少煩惱
疫情令不景嘅巿道更為惡化，無論日常生活抑或工作都倍添壓力，就連慈善團體都不能幸免。博愛醫院主席簡陳擷霞話，已經有一段日子做唔到籌款活動，就連每年嘅董事局就職典禮都決定取消。雖然係有啲可惜，不過亦唔使太過悲觀，最緊要心態正面，就會少好多煩惱。佢話留意到近日社會上愈嚟愈多人受疫情影響而變得情緒低落，所以博愛聯同某大保險公司，攜手搞咗個 「疫境前行」 關懷計劃，除咗派發防疫物資外，亦會邀請專家向有需要人士提供心理支援。
至於簡太日常又有咩方法去減壓呢？簡太話過往若遇到不快事，就會出街購物。後來發覺次次都買一大堆 「唔等使」 嘅嘢，實在太浪費喇，所以近年就改為約朋友打場波出身汗，健康得嚟又可以同朋友傾訴吓，通常呻完就冇事(口架)啦。簡太教路做人最緊要正面樂觀，諗唔通嘅事就不妨搵其他人幫吓手，始終一人計短二人計長，問題總有解決嘅辦法。
周駿達：聽吓海浪聲平復心情
副主席周駿達就話每逢遇到有壓力，就會一個人去海邊，只要望住個海乜都唔諗，聽吓海浪聲腦袋放空片刻，心情自然平復晒。
另一位副主席林群，就話做人要向好嘅方面睇。雖然疫情令大家嘅生活帶來改變，譬如七歲嘅細仔停課留家，兩公婆冇晒應酬，放工就返屋企食飯，但亦因為咁令家人多咗時間見面，感情反而好咗好多。林群話以前各有各忙，阿仔窮於應付功課又要抽時間參加興趣班，對住外傭姐姐仲多過對父母，根本冇乜機會傾偈，但呢幾個月相處多咗，依家阿仔會同佢傾心事，一齊喺屋企做吓運動，仲會主動打電話關心吓媽咪幾時放工、幾點返嚟食飯，聽到真係心都甜晒。
卓妮