中環出更：梁青華娶新抱 婚宴從簡禮節做足

結婚係人生大事，傳統婚禮中亦有唔少繁複禮節要跟隨，但現今社會好多人都選擇一切從簡，香港鐘表業總會前主席梁青華（華哥）尋日娶新抱，事關細仔梁仲康同太太冼穎心尋日拉埋天窗。
梁仲康（右）話同太太（左）心靈相通。
梁仲康（右）話同太太（左）心靈相通。

問到一對新人喺呢段時間舉行婚禮會唔會有啲唔完美？梁仲康就話都有少少，原本想舉行婚禮之後可以去度蜜月，依家惟有遲啲先去，問到佢結婚有好多嘢搞緊唔緊張？

依隨傳統梳頭接新娘斟茶

佢話讀書時已經認識太太，慢慢已經形成咗心靈相通嘅感覺，大家都希望婚禮一切從簡，加上雙方家長又冇咁大壓力畀自己，所以都尚算輕鬆，但佢話雖然從簡，但一啲傳統儀式，例如梳頭，接新娘，同斟茶畀父母等等一定要做足。

梁青華（右）憶起當年同太太（左）結婚，每樣禮節都要做足。（陳嘉順攝）
  • 梁青華（右）憶起當年同太太（左）結婚，每樣禮節都要做足。（陳嘉順攝）
梁仲元（左）話最開心係同太太（右）去揀請帖之後自己設計圖案。
  • 梁仲元（左）話最開心係同太太（右）去揀請帖之後自己設計圖案。

問起佢哥哥梁仲元當年籌備婚禮時大唔大壓力？梁仲元話因為時間充足，加上又唔係搞得好大，跟住個流程去做又唔會話好大壓力，佢話最主要大家雙方都攞到一個平衡點，仲話最開心同太太去揀請帖之後自己設計圖案，完成之後就攞請帖返屋企自己加工串絲帶，有時食完飯喺屋企冇嘢做，兩個就自動埋位串絲帶，佢形容好似當年人哋喺屋企串膠花一樣，諗番起都開心。

華哥就話明白依家時代唔同，好多嘢都冇跟得咁足，佢話當年同華嫂結婚嘅時候每樣禮節都要做足，自己擺酒係要擺頭尾圍，有兩個時段，方便有親戚朋友收工過嚟飲，佢仲話儀式簡單冇所謂，最緊要兩夫婦恩愛開心！

卓妮

第一手消息請下載on.cc東網iPhone/iPad/Android/Windows Phone Apps