政情：懶理禁聚令 支聯會照搞六四集會
支聯會每年都會舉行六四燭光集會，今年正值新冠肺炎疫情，港府亦實施禁聚令。適逢下月四日正正就係禁聚令嘅最後一日，喺禁聚令仲生效期間，但支聯會繼續堅持喺維多利亞公園舉行燭光集會，隨時違反禁聚令。
尋日支聯會派代表去到柴灣警署同警方代表會面，期間亦提出要舉辦集會嘅意願，表明會願意喺保持社交距離嘅情況下舉行晚會。不過喺會面後，佢哋就話警方冇回應可唔可以繼續舉辦，同時亦冇提供替代方案。佢哋形容警方對話毫無誠意，對此感到遺憾。
堅持喺維園點燭光
其實支聯會早前已經申請咗喺下周日舉辦「六四遊行」，但警方已經拒絕申請，於是佢哋改以街站形式進行。至於喺下周四晚上八點，無論警方會唔會就晚會批出不反對通知書，支聯會將堅持喺維園燃點燭光同埋進行默哀，同時亦會做定「兩手準備」，包括喺網上舉行集會，同埋呼籲市民喺各區燃點燭光作悼念。