政情：建制棄權 梁繼昌私人草案遭否決

「專業會計師」稱號擬限制

相關草案係禁止冇會計師資格嘅人士、或者唔符合執業要求嘅公司，使用「專業會計師」、或「註冊會計師」嘅稱謂。過往有白鴿黨議員涂謹申反對，認為會影響中小企會計事務所，同其他提供合法會計相關服務從業員嘅生存空間。

經歷上次甩轆，梁再次提出恢復二讀，喺尋日下晝嘅會議上，有個別建制派議員支持議案，投贊成票嘅麥美娟指有唔少不良財務公司以欺騙、利誘手段去呃人，認為條例草案可加強規管；金融界陳振英就認同修例原意，認為條例草案可以防止罪案惡法，但唔希望出現殺錯良民嘅情況。

議案喺分組點票下，分別喺地區直選獲十票贊成、三票反對、十二票棄權；喺功能界別則有九票贊成、三票反對、十票棄權，最終不獲通過，其中投反對票嘅包括有五位白鴿黨議員同埋勞工界潘兆平。

梁喺會後話之前有做拉票工作，認為可能因為最近嘅政治問題，所以有部分議員唔支持議案，但佢話會再接再厲喎。