中環出更：一萬蚊用嚟敬老 謝嘉恩：助刺激市道
政府決定全民派錢，雖然發放詳情仍有待公布，但數口精明之輩，就已經盤算一萬元嘅最佳用途。香港僑界社團聯會副秘書長謝嘉恩認為，不妨將筆錢投放於敬老活動。此舉既是答謝老友記過往為香港社會嘅辛勤貢獻，仲可以刺激目前疲弱不堪嘅經濟市道添。
謝嘉恩指當大家居家避疫大呼悶透之時，唔少置身院舍之內嘅老友記，就過着同外界近乎隔絕嘅枯燥生活。按疫情逐漸紓緩嘅速度，去到七月政府派錢之日，目前嘅社交限制都應該成為過去，屆時就可以組織一啲同老友記飲茶、送小禮物以及到郊外舒展筋骨嘅活動，若多人響應的話，老友記不但會好高興，又會令到飲食業、零售業同交通運輸嘅業務都有進帳，對提振本地經濟，相信會有一定幫助。佢又話一啲看似微不足道嘅善舉，譬如向陌生人送一個口罩，疫情傳播嘅風險就會降低啲，只要利他行為能夠惠及社會，最終大家都會獲益。
仁濟醫院前主席王賢訊，話由於自己係四位子女嘅爸爸，得到一萬元之後，將會用於小朋友嘅教育開支。佢話今次疫情嘅停課期好漫長，復課之後一定要同佢哋「追落後」。
王賢訊：可考慮捐畀慈善機構
除咗要強化小朋友嘅英文寫作能力，鋼琴同游水等興趣班亦必不可少。雖然呢一萬元會好快用晒，不過佢都呼籲綽有餘裕嘅家庭，考慮捐款予慈善機構，令教育、醫療同安老等項目得以持續運作。
教育局前局長孫明揚嘅夫人鍾小芬，就話一萬元雖然唔算大數目，不過運用得宜的話，都可以得到唔錯嘅社會效益。而協助長期病患者嘅組織，就將會係捐助對象，不過佢會搵多幾位善長，集腋成裘。
卓妮