政情:肥彭又回魂對港指手畫腳

疫情都未過,政治風波又起。香港近日就《基本法》第二十二條嘅解讀起爭拗,示威活動再現,就連立法會內務委員會主席選舉都演變成肢體衝突。點知喺香港咁亂時,末代港督彭定康(肥彭)又再回魂,高調評論香港事務,莫非又想刷存在感?

肥彭尋日接受一個視像訪問時指,中聯辦聲稱可以對香港事務行使監督權,係破壞中央對香港擁有高度自治嘅承諾。佢回應十五名民主派人士被捕,批評中央政府進一步埋葬一國兩制,又指近日嘅內會風波荒謬。

疑支持黑暴 鼓勵示威抗爭

肥彭唔單止對立法會同《基本法》說三道四,更加有支持黑暴之嫌。講到母親節嘅示威活動,肥彭話雖然未必人人都認同示威者破壞港鐵站同交通燈嘅行為,但數字顯示舊年到依家有成八千幾個示威者被捕,而警察就一個都冇令人思考真正暴力嘅係咪來自警察。被問到示威者係咪逐漸灰心唔再抗爭時,佢仲鼓勵示威者唔應該放棄,要有信心添!

第一手消息請下載on.cc東網iPhone/iPad/Android/Windows Phone Apps