政情：庫房變海洋公園提款機 陳智遠嘆輸畀星洲
新加坡向來都係香港嘅比較對象。食物及衞生局前政治助理陳智遠，日前喺社交網站貼文，藉住要搵庫房做提款機嘅海洋公園，同新加坡嘅旅遊景點Gardens by the Bay（濱海灣花園）嚟比較，感嘆香港不如星洲嘅事物，又多一件。
同樣政府持份 港差強人意
陳智遠喺貼文話，係咪要注資畀海洋公園救亡，佢相信大家都心裏有數。而佢就諗起新加坡嘅濱海灣花園，除咗作為遊客並以用家去享受之外，佢就更好奇以生態旅遊為主打嘅景點，其營運模式同財政結構究竟係點。所以佢就搵咗濱海灣花園嘅財政報告望一望，睇完之後只可以講，財政非常健康，而且營運狀況一年比一年好，現時每年訪客人次超過一千萬，舊年嘅營業收入達一億坡幣。未計每年政府嘅定額撥款，營運赤字只係八百六十萬坡幣，口碑亦愈來愈好。
佢又話並非長他人志氣，但係兩個都係政府擁有主要持份嘅項目，點解新加坡可以打出一片天，令人眼前一亮，反而香港海洋公園嘅經營就差強人意，蝕到要搵庫房做提款機？