中環出更:愛女下廚敬母 鍾采霖:培養自理能力

親手炮製菜餚供媽媽享用,係令人窩心嘅孝親之舉,因此每年嘅母親節,總有團體舉辦兒童烹飪比賽嘅活動。社企「絲打便當」創辦人鍾采霖(Vince),佢嘅囡囡亦會參與廚藝比試,但礙於疫情,活動不設評審試食,參賽者只需將自創菜式及烹調過程拍成短片,繼而上載到指定網站評分,所以囡囡下廚,Vince就要從旁拍攝。

雖然今次廚藝活動側重於菜式嘅設計同展示,不過Vince認為,能夠親手完成一道菜式,小朋友既可增添成就感,又可強化小手肌,況且掌握煮食技巧,能促進個人嘅自理能力,所以囡囡入得廚房,佢係相當樂見。然而考慮到安全問題,家中廚房就要全面使用電力爐具。除咗煮食,Vince話小朋友都要懂得做家務,儘管佢都有聘用外傭姐姐,但係佢間中都會提醒對方,要囡囡幫手洗碗、收衫同摺衫,做完之後就會有貼紙做獎勵。

母親節即將到臨,已故丑生王梁醒波嘅長孫梁智宏,就話政府日前放寬群組聚集嘅限制,都算係適當時機,否則一家人到食肆聚餐慶祝母親節,就可能要分幾張枱喇。至於會唔會因為疫情,多咗人選擇喺屋企下廚以度過母親節呢?佢就話好難估計,不過早前人人都居家避疫,百貨公司門庭冷落,連烏蠅都唔多隻,但係一去到復活節,就愈來愈多人按捺不住,要出街消費同購物。所以佢相信今年嘅母親節,零售市道會擺脫先前嘅呆滯表現。

伍婉婷陪媽媽行街過節

文化力量秘書長伍婉婷(Yolanda)就指疫情之下私人時間倍增,得以重拾下廚呢種「女人天性」,煲「老火湯」嘅拿手絕活再度施展,仲係咁大個女煮飯煮得最多嘅時期。Yolanda見母親節將至,日前陪媽媽去買禮物順便享受兩母女嘅二人世界,佢先至驚覺原來都好耐無試過同媽媽一齊行街喇。

卓妮

第一手消息請下載on.cc東網iPhone/iPad/Android/Windows Phone Apps