政情：鄉議局開會 移師大劇院 四人一枱
新界鄉議局執行委員會會議因疫情多次押後，喺尋日終於順利舉行。鄉議局為咗避免出現人多擠迫嘅情況，將會議擺喺鄉議局大樓嘅大劇院舉行，每枱仲要得四張櫈，希望將風險減到最低。
維修大門撥款 昨始通過
大劇院本身係用嚟出租畀外界團體舉辦包括教會聚會、畢業禮等大型活動。但因為舊年嘅一連串示威遊行，加上現時疫情影響，導致出租率偏低，甚至接近零收入添。於是開會嘅時候，委員都話要諗方法，睇吓點樣令大樓有租金收入。大劇院地方夠大，依家索性就拎嚟開會，出席人士仲需要先探熱、再用酒精搓手液消毒雙手先可以入內。
而上年畀示威者打爆鄉議局大樓嘅大門，依家都未整番好，點解搞咁耐呢？原因係鄉議局幾個月冇開會，導致有關維修嘅撥款，要去到尋日先得以通過，相信好快就會整番好啦。而新大門將會同以前一樣，以落地玻璃為主，但就會加番個金屬大閘，唔知係咪驚再次被打爆呢？