政情：議辦一個月兩遭破壞 黃定光 張國鈞 報警促擒兇
身兼行政會議成員嘅議員張國鈞（Horace）位於柴灣漁灣邨嘅辦事處，一個月內兩度遭人破壞，繼上月被淋紅油後，該議辦外嘅告示板前日又再被人用紅油噴上帶有政治色彩嘅侮辱性字句，佢強烈譴責暴徒嘅違法惡行，並促請警方嚴肅跟進，將暴徒繩之以法。
要求門口准裝天眼
該議辦屬於Horace同黨友、進出口界議員黃定光嘅聯合辦事處，前日議辦外告示板張貼嘅通告被撕毀，散落一地，有人更用紅油噴上字句。兩人認為動機係出於政見唔同，又對議辦一個月內被兩次嚴重破壞感到強烈憤慨，唔單止再次譴責有關行為，亦已就事件報警。
由於議辦屢遭破壞，佢哋更要求房屋署允許喺議辦門口位置安裝監察鏡頭，喺唔侵犯任何個人私隱嘅情況下，加強議辦門外嘅保安喎。