政情：八網難逃：神探輝復出 傳授家居防疫錦囊
近日新冠肺炎肆虐，唔少市民都擔心會重演當年沙士嘅慘況。當年曾協助對抗沙士嘅衞生防護中心前總監曾浩輝（Thomas）近日就「復出」，不過就唔係返衞生署，而係搖身一變做「神探」，仲攞住個放大鏡喺廚房鋅盆去水渠、廁所嘅馬桶同門柄左望右望，唔知想查啲咩線索呢？
講解流感傷風肺炎分別
實情係議員陳凱欣為咗提醒市民防疫，近日就搵咗「神探輝」Thomas拍短片，講解病毒最易匿喺咩地方。Thomas又分享其他防疫錦囊，例如點樣正確戴口罩同清潔家居。佢話，平時靠一比九十九嘅漂白水已經可以殺滅細菌，但如果屋企人患病，甚至嘔吐，就要開一比四十九嘅漂白水，用勁啲嘅氯氣殺滅細菌喇。
Thomas又好細心咁講解流感、傷風同肺炎嘅分別，問到已經到咗流感高峰期，依家先注射流感疫苗有冇用，佢就話依家打都仲有保護作用o架。