政情：蔡澤鴻嚴控血糖 慎選賀年食品
歡度新歲，通常都唔少得各式各樣嘅賀年食品。不過觀塘區議會主席蔡澤鴻食嘅過年食品就來來去去都係獨沽一味，只有蘿蔔糕，至於年糕、糖果之類嘅賀年食物就唔會出現喺佢餐枱上喇。點解呢？佢就話自己患糖尿病，嚴控血糖下，含糖量高嘅食物都可免則免喎。
蔡憶述廿幾年前，有一次由內地攜帶貨物返港，喺上水彩園邨準備過馬路時突然覺得疲憊乏力，跌坐路邊，送院檢驗先至知血糖超標幾倍，確診患上糖尿病。從此佢就好小心飲食，就算想食粒朱古力，放入嘴之前都要諗過度過先。佢又話，眼、腎、腳係糖尿病患者最顧慮嘅三件事，有時雙腳嘅神經線受血糖干擾，就會有麻痹感覺，咁就提醒佢唔可以畀病情惡化喇。
差10磅達致理想體重
佢又話，維持適當體重對糖尿病患者而言至關重要，佢就由高峰期二百四十磅減至目前一百八十磅，雖然成績唔錯，但醫生同佢講一百七十磅先至係佢嘅理想體重，所以佢要再努力啲去節制飲食同做運動至得。