中環出更：一罩用三日 黃冰芬鬧爆港府冇作為
依家新冠肺炎疫情嚴重，人人都撲口罩抗疫，周圍都「一罩難求」。前沙田區議員黃冰芬（Iris）都要四處搵口罩，唔止係自己用，亦都希望派發畀社區內有需要嘅人。但佢都坦言，依家真係好難搵到可提供大量口罩嘅供應商，仲話自己一個口罩用咗三日，鬧爆政府完全冇作為。
意見接受 做法照舊
Iris話，依家全球出現口罩短缺，但政府偏偏就用價低者得嘅招標形式採購口罩，係完全唔可行嘅做法，咁落去真係唔知幾時先買到口罩喇。其所屬嘅政黨之前都有同政府官員會面，要求政府要改變現時購買口罩嘅形式，但結果政府都係「意見接受，做法照舊」，真係激氣。雖然有工會籌辦設立口罩生產工場，不過政府喺購買機器同搵場地等工作上都冇積極幫助，佢形容政府就好似踢一下、郁一下咁，真係令人好無奈咁話。
佢又提議政府可以考慮用落馬洲邊境購物城嚟做口罩工廠，話若果本港可以發展「口罩工業」，自給自足嘅話，市民就唔使咁苦惱喎。不過學佢話齋，個政府一向「意見接受，做法照舊」，睇怕都唔好咁大期望喇。
卓妮