我有正能量：未洗手中招 變得更謹慎小心
「我係一個非常謹慎嘅人，係非常注意安全，點知畀安全同謹慎害咗我。」因為未有洗手而得上疫症，非典型肺炎康復者蘇志強指自己從此變得更加小心，「當年仲會笑人『洗手洗手洗手』，原來真係好重要。」他現時外出後亦不會用手觸摸面部，連架起眼鏡亦只能用手背，又會經常以自己過來人的身份，提醒朋友、家人洗手和不應重複佩戴口罩。
籲團結抗疫 讓口罩予上班族
回想起當年沙士來襲，雖然自己賠上健康，但他亦看到人性光輝，「我哋社會當年好團結……」此時此刻，他哽咽地說：「醫護人員真係好好，冇咗佢哋，我哋搞唔掂。」雙目紅了一圈，對於現時疫症重臨，蘇坦言心情沉重不安，近日更有不少人搶購口罩與日用品，令社會瀰漫惶恐情緒。他呼籲大眾團結抗疫，應把口罩讓給上班一族，長者應多留在家中，「人哋要逼車、逼港鐵，所以有時我都情願畀自己嗰個人哋用。」