政情：區諾軒官非纏身 憂失教席步邵家臻後塵
因選舉呈請案而喪失立法會議席嘅區諾軒近排官非纏身，佢尋日就喺社交網站話審訊前日已完成，依家最憂心嘅係案件唔知會唔會影響佢嘅教學工作。區又提到，本身為大學講師嘅社會福利界立法會議員邵家臻（阿臻）因違法佔領行動案被判囚一事，教學工作受到影響，睇嚟區都擔心自己步阿臻後塵喇。
任大專講師 4科目涉70學生
任職大專講師嘅區諾軒尋日喺社交網站發貼文，話成為議員前自己視擔任大專講師為畢生志業，當下最憂心就係案件唔知會否影響教學工作，又話可以用任何方式指控佢，但唔應該波及學生。區就同我哋講，佢喺城大專上學院擔任兼職講師，教緊四個科目，涉及六、七十個學生，唔怪得之佢咁講啦。
佢又提到，自被捕以來已為佢自己及家人帶來相當生活壓力。其實區去年冇角逐連任南區區議員後，又喪失埋立法會議席，如果連教職都冇埋就變「三失」，咁搞法都真係好閉翳嘅。