政情：譚文豪「打底」行工廠區花市
今年維園花市取消乾貨區，真係少咗好多嘢睇，有觀塘區議員同民間團體合作，喺工廠區搞咗個花市畀居民辦年貨，身兼工業大廈政策小組主席嘅立法會議員譚文豪（Jeremy）尋日就為呢個花市主持開幕禮，見佢同一眾區議員都戴晒口罩，唔知係咪擔心近排來勢洶洶嘅武漢肺炎呢？
Jeremy話唔擔心就假嘅，所以花市現場都有口罩同梘液供應，而且唔排除其他區居民都會嚟觀塘行花市，預料大會都會做好人流管制。不過市民近日衞生意識都「打晒底」，所以都唔怕因為人流密集而加大傳播疾病風險喎。
斥維園年宵冇乾貨毀氣氛
維園花市冇乾貨賣，佢就覺得搞到冇咩過年氣氛，又批評政府取消維園乾貨攤檔擺明係唔理市民實際需要。其實如果唔係持續嘅暴力示威令社會動盪，政府部門又點會以保障市民安全為由取消乾貨區呢？相信市民對邊個係罪魁禍首都心中有數喇。