政情：學者狠批 戴耀廷鼓動青年犯法

其實早喺舊年四月，戴耀廷被法庭裁定串謀作出公眾妨擾及煽惑他人作出公眾妨擾兩罪成立，被判監十六個月，其後戴與同案另外被裁定罪成嘅八人均向上訴庭提出上訴，而佢喺監獄服刑約四個月後，獲批准保釋外出等候上訴，而港大「探討充分解僱理由委員會」本月亦正式討論應否革除戴嘅教席。

縱容暴力 販賣恐懼

顧敏康喺座談會上話，所有人都應該受到法律規管，但戴就宣揚違法達義係法治嘅高點，其實就係鼓動市民不守法。另外，佢仲話戴指法律不公義先有機會發生公民抗命，但明明修訂《逃犯條例》就係堵塞法律漏洞，防止香港變成「逃犯天堂」，而反對派就煽動民眾嘅恐懼心態，口講公民抗命，實則「打、砸、搶、燒、謀殺」，根本唔可以承認係真正嘅公民抗命。顧仲形容反對派係「縱容暴力派別」，拎民主自由做護盾，建議法院要迅速審理相關案件，維護香港嘅法治精神。

同場嘅香港教育工作者聯會會長黃均瑜就話，示威浪潮就好似世界盃咁帶有周期性，因為根源問題冇解決，每隔幾年，新一批嘅年輕人又會被反對派煽動上街。佢大鬧反對派向年輕人宣傳內地司法不公，形容係「販賣恐懼」，直言教育界出問題！

掠水基金又搞眾籌

另一方面，守護公義基金就繼續幫包括戴耀廷在內嘅「佔中九子」籌錢打官司，宣稱支出已經超過四百萬元，仲話律師友情價同法律援助已經計算在內，但仍然唔夠錢喎。其實，呢個基金一早已經被市民嘲為「掠水基金」，多次騎劫遊行籌款，而今次又要搞眾籌，莫非每次出事都要市民埋單？