政情：八網難逃：袁嘉蔚嗌好肚餓 話狗餅都唔放過
就快到農曆新年，唔少區議會都會喺地區幫街坊寫揮春，南區區議員袁嘉蔚（Tiffany）都唔例外，仲話歡迎大家去「懲罰」佢隻手。唔知係咪顧住寫揮春，冇時間食嘢，Tiffany就話呢排日日都好肚餓，仲話要同狗狗爭食，唔通真係肚餓到狗餅都唔放過。
上載狗仔生活照 網民意見兩極
話說Tiffany喺社交平台上載咗幾張同狗仔嘅合照，當中有幾張相佢就拎住狗餅，甚至將狗餅擺入口。Tiffany又喺貼文寫道︰「姐姐幫你試吓有冇毒」、「同狗狗爭食」、「呢排日日都好肚餓」，喺最後一張相中，佢就留言︰「主子冇毒，可以食喇」。
其實Tiffany不時都喺社交平台發布區內軼事同生活照片，但有網民就留言話Tiffany係區議員，質疑佢點解喺度玩狗，認為佢為港人服務，會好忙碌；但亦有人大讚佢啲相影得好靚。睇嚟市民對區議員發布個人生活寫照都有唔同意見喎。