肺炎疫情唔清唔楚 求其把關死得人多

燈燈燈櫈,燈燈燈櫈,功夫茶正式隆重宣布,最受全球關注嘅中國城市,香港坐穩個寶座成七個月,依家要退位讓「炎」喇,呢期梗係湖北武漢最出位啦,連報紙頭條都由長期榜首嘅香港暴潮變做武漢肺炎,直頭重演當年沙士震驚世界嘅氣勢。武漢近年躍升為內地一線城市,依家更加聞名天下,成為新型冠狀病毒肺炎嘅源頭城市,大家仲用武漢去稱呼呢隻肺炎,嗰度累計病例四十一宗,最近又死多個人,總共兩條人命,而且世界衞生組織不排除會人傳人,問你怕未?

依家隨時走一轉武漢就領嘢,好似本來住喺日本神奈川縣嘅中國男子,去一去武漢就受到感染,返到日本病發,成為該國確診首宗武漢肺炎,泰國呢個禮拜確診兩單,最新鮮熱辣公布個案又係內地婦人喺武漢直飛曼谷觀光,點知連人帶病毒入境,依家需要隔離。不單止日本、泰國中招,香港、澳門、台灣、新加坡、越南同埋南韓,都有通報疑似病例,睇怕病毒四圍走,蔓延亞洲,殺到去全球喇。香港依家有超過八十宗懷疑個案,雖然仲未有確診,但專家估計,以中港人流來往頻密程度,呢鋪都好難走得甩喇!

內地官方到依家都仲話暫時只係得武漢有確診個案,你信唔信吖!功夫茶最擔心係,農曆新年將至,內地春運人流億億聲,武漢又係中南部交通樞紐,肺炎傳去其他省市機會大大提高,到時全中國都賴嘢就大件事。而且去外國旅行亦大有人在,預計成百萬中國旅客會去泰國歡度新歲。你就玩得開心,人哋外國就驚驚喇,泰國政府喺開通武漢航線嘅幾個機場加強檢測,更加要求航空公司拒絕發燒乘客登機。日本政府喺首相府危機管理中心成立「情報聯絡室」,專門應付呢隻肺炎。成田機場加強檢疫,要求旅客如果食過退燒藥就要申報,皆因嗰單中招患者食完退燒藥竟然成功過關。

對比外國防疫森嚴,香港就慢幾拍,到依家都唔使旅客申報健康;內地連續有幾個帶病者出到關,咁代表把關穿晒窿啦!而且疫情交代唔清唔楚,內地專家本月七日已破解出肺炎嘅新型冠狀病毒,但足足遲咗一星期先將病毒基因圖譜公開同埋交畀世衞,雖然香港都攞到病毒基因圖譜,推出咗快速測試,但仲差最重要嘅個案臨床數據,比較難預測病情變化或者疫情走向,更加難對症下藥。就算內地唔係刻意隱瞞疫情,但依家唔湯唔水,遇着香港班廢官,癡癡呆呆,坐埋一枱,靠佢哋把關,真係死得人多。唔想沙士慘劇重演,為官者麻煩畀多幾錢肉緊,唔使功夫茶下下教你點做啩!

第一手消息請下載on.cc東網iPhone/iPad/Android/Windows Phone Apps