中環出更：話黃色經濟圈屬假象 張宇人：未見過成功
反修例風波持續逾七個月仍未平息，唔單止令社會嚴重撕裂，就連店舖都要分黃、藍，近排仲有網民發起「壯大黃色經濟圈」。身兼行政會議成員嘅立法會飲食界議員張宇人（Tommy）尋日喺一個電視台節目上話喺全球過去五十年，都未見過以政治理念掛帥去維持飲食業生意有成功例子。
Tommy更加話大家見到嘅未必係事實嘅真相，事關喺食肆門口大排長龍，係咪對收銀機同食肆盤數好咗呢，大家都唔知？
食肆排長龍 盤數亦未必好咗
而大排長龍係因為食肆裏面嘅嘢一定好食呢，都唔知o架？所以有啲事情可能係假象。
早前民主派喺區議會選舉大勝，奪取三百多個議席，隨之有工會更發動黃店登記做功能組別嘅選民，有黃店老闆更計劃參選競逐立法會飲食界嘅議席，矛頭直指Tommy。佢就話業界嘅選民眾多，而且選民立場一直唔係一面倒嘅，而佢過去亦曾面對過泛民主派嘅挑戰，唔認為可以同區議會選舉相提並論喎。
卓妮