政情：植潔鈴親民 送禮扮賭神
年近歲晚，相信唔少市民都要花錢買年貨，咁佢哋對農曆新年又有乜願望呢？梗係想發大財喇！有乜嘢財路？有建制派政黨嘅小花就有門路喎。
話說民建聯東區區議員植潔鈴（Elaine）喺Facebook上載咗段短片，配上《賭神》系列電影嘅背景音樂，見佢學足賭神咁，坐喺張櫈由背面轉到前面，隻手仲揸住啲嘢，但唔係五條煙，而係一疊利是，仲寫住「一定發」添！認真搞笑！
拍搞笑短片 網民倡選港姐
原來佢係話畀啲街坊聽，印住一定發嘅利是封，有啲派咗入大廈信箱，入唔到信箱嘅大廈，就提醒居民去佢辦事處或街站攞喎，估唔到派利是封都要扮嘢。
相信唔少市民對呢系列嘅電影印象深刻，呢條短片出咗街後，有網友直情講番對白出嚟，話「我喜歡這個片，好笑得嚟又親民，夠貼地又有共鳴，各位觀眾五條煙。」亦有網友問Elaine係咪想做賭后，另有網友更加大讚佢係靚女，叫佢去選港姐添！