中環出更:老鴿單仲偕口講傳承 照爭區會主席

葵青區議會後日召開首次會議,民主派喺三十二席議席中奪得二十七席,成為議會內嘅大多數,佢哋日前經過初選後,決定由民主黨(白鴿黨)單仲偕((先刂)雞)同「葵青傳承」張文龍參選正、副主席。話時話,(先刂)雞之前做過十八年區議員,期間亦做過主席,佢呢隻老鴿仲要爭做主席,仲係咪要傳承呀?

提議任期改兩年 之後再算

(先刂)雞曾公開提議將區議會主席任期由四年改為兩年,佢話最新情況喺葵青區議會都有共識咁做,正副主席兩年後作中期檢討,自動請辭再進行補選。問到白鴿黨兩年後會唔會再派人參選,又驚唔驚畀人話霸住個位唔願走啊?佢話兩年後再算啦,邊個想選都冇問題o架!仲話「我都可以再選,繼續連任o架!」

區議會會議當日,佢哋會就反修例運動嘅死傷者默哀同唱《願榮光歸香港》,並提出三項動議,要求政府落實五大訴求、譴責警暴及要求問責官員下台。另外亦將修改多項會議常規,包括取消授權票、進行視像直播、取消增選委員等,讓市民更有效監察區議會工作。

八個事務委員會方面,民主派亦有共識其中五個主席會由連任區議員擔任,另外三個主席就由新當選區議員擔任,而事務委員會副主席就全部由新當選區議員擔任。

卓妮

第一手消息請下載on.cc東網iPhone/iPad/Android/Windows Phone Apps